Føroyskt tilvísingargenom

Eitt føroyskt tilvísingargenom vísir miðal ílegusamansetingina hjá føroyingum og vísir, hvørjar arvaligar variatiónir síggjast í Føroyum. Tað føroyska tilvísingargenomið verður í høvuðsheitum samansett av dátum frá fleiri sonevndum trio´um, tvs. mammu, pápa og barni. Við teirra dátum ber m.a. til at síggja, um frábrigdi (mutatiónir) eru arvað frá foreldrunum, ella um talan er um nýggjar variatiónir.

Dáturnar verða einans viðgjørdar í samlaðum høpi og tískil kann einki sigast um tínar ítøkiligu arvaeginleikar. Tú fært tí onga afturboðan um greiningina.

Luttekur tú í FarGen-verkætlanini, verða tínar dátur møguliga brúktar til at seta saman føroyska tilvísingargenomið. Hetta er eitt týdningarmikið amboð innan ílegugransking.

Tilvísingargenomið vísir miðalføroyingin
Eitt tilvísingargenom kann sigast at vera eitt miðal genom, sum byggir á dátur frá nógvum persónum úr sama landafrøðiliga øki. Tveir persónar úr familjum, sum hava búð í Føroyum í nógv ættarlið, hava sannlíkt fleiri felagseyðkenni í sínum DNA´i enn tveir persónar úr økjum, sum liggja langt frá hvørjum øðrum. Eitt tilvísingargenom kann sostatt sigast at vera eitt genom, sum umboðar fólk í einum avmarkaðum øki. 

Tilvísingargenomið kann nýtast sum tilvísing ella samanberingargrundarlag í sambandi við ílegugransking av einstaklingum ella sjúklingabólkum.