Hví skal eg luttaka?

Ætlanin við FarGen-verkætlanini er at gera eina dátuskrá við talgildum dátum um arvaeginleikar (genom) føroyinga. Luttekur tú í FarGen-verkætlanini verður tín arvastrongur lisin og tínar dátur verða partur av hesi dátuskránni. Málið við dátuskránni er at menna granskingarundirstøðukervið hjá Ílegusavninum soleiðis, at nýggir møguleikar fyri genomgransking av føroyska fólkinum kunnu fremjast.

Dáturnar í dátuskránni kunnu m.a. nýtast í gransking, sum hevur til endamáls at kanna sambandið millum arvafrøðiligt bakstøði, umhvørvisávirkan og sjúku. Málið er, at úrslit frá tílíkari gransking, sum frá líður, skulu verða brúkt til at menna møguleikar fyri fyribyrging og viðgerð í heilsuverkinum.

Les um ágóðar og váðar við genomkanningum.