Verkætlan

Málið við FarGen-verkætlanini er at lesa arvastreingin (genomið) hjá øllum føroyingum, sum vilja tað. Endamálið er at menna ein pall, sum letur upp fyri framtíðarmøguleikunum fyri gransking í føroyskum ílegum. Saman við vitan úr heilsuverkinum og Ættarbandsskránni letur kortleggingin av føroysku ílegunum upp fyri møguleikunum at betra um fyribyrging og viðgerð. Av tí at talan er um fyrstu slíku kanning í Føroyum, er málið lutvíst eisini førleikamenning at fyrireika DNA til genom-lesing og at handfara og goyma talgildar dátur frá lesingini undir tryggum umstøðum.

Í fyrstu atløgu verða arvastreingirnir hjá 1.500 føroyingum lisnir, og talgildu dátur teirra verða skrásettar í einum dátugrunni hjá Ílegusavninum. Dáturnar verða nýttar til at seta saman eitt føroyskt tilvísingargenom (referencegenom). Kannað verður ikki, hvat úrslitini siga um tínar møguligu sjúkur og arvaeginleikar.

Seinni verður tú møguliga boðin at luttaka í eini ella fleiri ítøkiligum granskingarverkætlanum, og tú gert sjálv/ur av, um tú vilt luttaka í hvørjari einstakari verkætlan.