Ættarbandsskráin

Ættarbandsskráin er ein fullfíggjað ættartalva yvir allar føroyingar frá um 1650 til í dag. Í ávísum førum ber til at greina ættina heilt aftur til 1100. Tað er Ílegusavnið, sum hevur tikið stig til at menna Ættarbandsskránna, sum verður brúkt til heilsugransking. Ættarbandsskráin er eitt hent amboð í mun til ílegugransking, tí til ber at kanna sambandið millum ættarbregði og sjúku, sum er tongt at ílegubreki.  

Ættarbandsskráin verður gjørd í samstarvi við Tjóðskjalasavnið, og skrásetingarnar byggja á keldur so sum kirkjubøkur, fólkateljingar, Landsfólkayvirlitið v.m.

Í oktober 2020 fekk almenningurin í Føroyum atgongd til Ættarbandsskránna. Umvegis Vangan hjá Talgildu Føroyum kann hvør einstakur føroyingur nú fáa innlit í sínar egnu forfedrar í beinari linju.

Hoyr meira um Ættarbandsskránna í samrøðu við Guðrið Andorsdóttir, stjóra á Ílegusavninum. Samrøðan er frá sendingini, Vitan, hjá KVF frá 18. juli 2017.