Føroyskt tilvísingargenom

Eitt av endamálunum við FarGen er at menna eitt føroyskt tilvísingargenom. Eitt tilvísingargenom byggir á genomdátur frá nógvum persónum úr sama landafrøðiliga øki. Føroyska tilvísingargenomið vísir miðal ílegusamansetingina hjá føroyingum og vísir, hvørjar íleguvariatiónir síggjast í Føroyum. 

Luttekur tú í FarGen-verkætlanini, verða tínar dátur partur av føroyska tilvísingargenominum. Allar dátur eru navnloyndar og verða einans viðgjørdar í samlaðum høpi.

Bakstøði

Tá tú leitar eftir einum møguligum sjúkuelvandi íleguvarianti, er neyðugt at hava okkurt at samanbera við, so tú kanst meta um, hvørt ein variantur er vanligur ella ikki. Til hetta endamálið hava granskarar og onnur ment sonevnda humana tilvísingargenomið, sum kann sigast vera eitt altjóða miðalgenom fyri menniskjað. Humana tilvísingargenomið byggir á stórar nøgdir av dátum frá genomkanningum kring heimin, og tað verður dagført javnan, so hvørt sum fleiri dátur verða útvegaðar.

Humana tilvísingargenomið hevur tó ta avmarking, at tað tekur ikki hædd fyri, at ymsir íleguvariantar hava ymsan títtleika, alt eftir hvar í heiminum tú ert. Ofta hava ávísir variantar nevniliga hópað seg upp gjøgnum fleiri ættarlið hjá fólkabólkum í ávísum økjum, og eru vorðnir vanligir har. Eitt nú hava fólk í Norðurlondum nógvar felagsvariantar, meðan fólk í Afrika hava aðrar variantar í felag. Tí merkir eitt frábrigdi í mun til altjóða humana tilvísingargenomið ikki endiliga, at talan er um ein sjáldsaman og møguliga sjúkuelvandi variant, tí hesin varianturin kann vera heilt vanligur í einum ávísum øki.

Føroyar verða roknaðar sum eitt ílegufrøðiliga avbyrgt øki, og tað er umráðandi, at vit hava okkara egnu tilvísing, sum vísir, hvussu ílegusamansetingin hjá einum eyðkendum føroyingi er. Føroyska tilvísingargenomið kann leiðbeina, um til ber antin at staðfesta ella útiloka, at ávísir íleguvariantar kunnu elva til sjúku.