Verkætlan

Málið við FarGen-verkætlanini er at savna lívfrøðiligt tilfar frá føroyingum og fáa kanningar í lag, sum kunnu menna møguleikarnar fyri sjúkufyribyrging og -viðgerð. FarGen ger genom(ílegu)- og heilsukanningar av føroyingum og savnar kanningarúrslitini í einum dátugrunni, sum er ætlaður gransking í føroyskum ílegum. 

Við FarGen 2 (apríl 2022) verður verkætlanin víðkað, og farið verður undir at kanna ávísar sjúkur, sum hava lutfalsliga høgan títtleika í Føroyum. Málið er at kunna eyðmerkja ílegur og onnur lívfrøðilig mát, sum kunnu vera orsøk til hesar sjúkurnar. Á henda hátt verða ítøkilig stig tikin til at skapa grundarlag fyri persónlagaðum medisini. Persónlagað medisin byggir á vitan um genomið hjá tí einstaka, umhvørvi og lívsstíl, og letur upp fyri at málrætta viðgerðina í størri mun, so heilivágurin virkar á bestan hátt. 

FarGen mennir eitt føroyskt tilvísingargenom, sum vísir miðal ílegusamansetingina hjá føroyingum, og sum kann geva eitt yvirlit um títtleikan av ymsum íleguvariantum í Føroyum. Eisini verður kannað, hvør upprunin og søgan hjá føroysku búfjøldini er, og hvussu tætt skyldir føroyingar eru í dag.

Far inn á Vangan/Ílegusavnið og les kunningartilfar um FarGen 2 og fyll út eitt spurnablað um tína bakgrund, heilsu og hugburð (verður tøkt fyrsta dagin). Samleikin krevst fyri at rita inn á Vangan. Kunningartilfarið er eisini tøkt her.

Tað er Ílegusavnið, sum er stovnur undir Heilsumálaráðnum, ið stendur fyri FarGen-verkætlanini.